«O‘zeltexsanoat» uyushmasida koronavirus pandemiyasi tufayli xorijlik investorlar va biznes vakillari bilan masofadan turib videomuloqot olib borilmoqda. Muzokaralarda asosan amalga oshirilishi rejalashtirilayotgan yangi istiqbolli investitsiya loyihalari bo‘yicha muhokamalar olib borildi.

Malayziyaning «Percetakan Nasional Malaysia Berhad» (PNMB) kompaniyasi bilan o‘tkazilgan muloqotda tomonlar bank, savdo va transport sohalarida maxsus to‘lov kartalarini ishlab chiqarish, qattiq maishiy chiqindilarni utilizatsiya qilish bo‘yicha ijtimoiy loyihalarni amalga oshirish yuzasidan fikr almashdilar.

Ta’kidlash joizki, PNMB 1888 yilda poligrafiya kompaniyasi sifatida tashkil etilgan va hozirda nashriyot va matbaa xizmatlarini ko‘rsatishda davom etmoqda, shuningdek xavfsiz bosma mahsulotlarni, smart-kartalarni ishlab chiqaradi. U bank, savdo va transport sohalarida moliyaviy optimallashtirish uchun dasturiy ta’minotni ishlab chiqish sohasida ishlaydi. Kompaniyaning chet elda o‘nta filiallari mavjud.